الدنيا فيها أكتر

"قالوا مجنون اللي يفكر

الدنيا فيها أكتر

طب فين و أذاي و لمين"

ده طبعا مطلع إعلان إتصالات لرمضان 2010 و الحقيقة كان شعوري إتجاه الإعلان زي شعور الطفل اللي عنده 3 سنين إتجاه الإعلانات سعادة متناهية و أقعد أغني معاهم و اجي من أخر الدنيا اول ما أسمع الإعلان و يا ويلوا يا سواد ليله اللي يستجري و يحول أو يعمل mute بس ما كنتش عارفة انا بحبه ليه قوي كده ....في الأول قلت يمكن علشان أحمد عز ................ من كام يوم أكتشفت أنا ليه كنت بحب الإعلان فعلا علشان الجملة اللي فوق دي......علشان اناالمجنونة اللي متأكده ان الدنيا فيها أكتر .....أن الدنيا مش دار شقاء و بس و أنها مش عيشة و السلام .....و أن الفكرة الأساسية مش أنك تعيش مستني تموت....... لأ ما هو ربنا مش مديك كل النعم دي و منها العقل و الشعور علشان تكبتهم و لا جسم الواحد في هرمونات تؤدي إلى السعادة و الصفاء و الطبيعي انك تعيش مكتئب ........ الفكرة أنك تبقى متأكد أن مهما كان اللي بتمر بيه فيه حاجة حلوة قوي جاية بعدين حاجة هي جزاتك انك إستحملت و عرفت تعيش الفترة الصعبة من حياتك.....و تعرف أنك لما تبقى كويس مع حد مهما كان اللي قدامك ربنا هيجزيك بيه في الدنيا و الأخرة (مش في الأخرة بس) و أنك لو فكرت شوية أو حتى صبرت بس من غير ما تفكر ربنا هيوريك الحكمة من اللي حصل.....فمهما وصفوك بالجنون و مهما أتهموك انك خيالي مش واقعي لازم تبقى متأكد من حاجة واحدة أن أيوه الدنيا لسه فيها أكتر

أنا عندي مشكلة

انا عندي مشكلة انا ليه مشكلة

الحب جديد علي وحكاية مطولة

ودنيا قصاد عينايا في الحب مقفلة

ياللي حبيتو قبلي وصادفتكم مشاكلي

اروح لمين قلولي يحل المشكلة

إقتباس بسيط من أغنية شادية بنفس عنوان المقال......في الأغنية شادية كانت بتقول أن حبيبها أتهجر قبل كده و مطلع قرفه كله عليها........ مشكلتي من نوع تاني خالص ....أكبر من حبيب و حبيبة ...... مشكلتي مشكلة حلم مشكلة بنات كتير ما عندهمش إستعداد يضحوا بأحلامهم الوردية و يتجوزوا جوازه و السلام....و مش قصدي بجوازه و السلام أن الواحد يتجوز حد مش كويس بس قصدي أنه يتجوز حد علشان هو بحسابات العقل و بالورقة و القلم ممتاز بس بحسابات القلب زيه زي غيره .....حد تبقي عارفة أنك مش هتبقي تعيسة معاه بس مش هتبقي سعيدة برضة........جوازه من الجوازات اللي ماليه البيوت دي لناس لا هم سعده و لا تعسه....... مشكلتي أني شفت يعني إيه حد يبقى مبسوط بجوزه ماسك في إيده و سعيد و عايز يشاور لكل الناس و يقولهم بصوا ده جوزي و تناديه بإسمه أو حبيبي مش تقولوا يا حاج و لا يا دكتور ......عايزه حد لما بعد كده أبقى قرفانة منه و مش قادره أبص في وشه أفتكر أنأ أتجوزته ليه و ما تبقاش الإجابة ما هو ماما و بابا كانوا شايفين أنه كويس.......و يفضل الكلمة الأخيرة مش مطلوب عريس مطلوب فارس همام

الخميس 15/12/2011

و ده تقريري بتاع الإنتخابات
روحت إمبارح على خمسة كده لقيت الدنيا زحمة و الناس بعد ما بتوصل لباب المدرسة بتروح علشان الدنيا جوه أزحم من بره و لقيت الست اللي قدامي بتقول أنا طبخت لعيالي و أكلتهم و جيت قلت أنا بقى أروح و أجي بكره في معاد الطبيخ قصدي عالظهر كده

توجهت النهاردة للمدرسة بعد رحلة طويلة من بيتنا لقيت الدنيا زحمة أكتر من إمبارح "قلت منا بومة يعني أكيد مش هتبقى فاضية" و إستمتعت بالناس و هي بتأكد أن الناس اللي هنا نحس لأن كل المدارس التانية فاضية قلت مش هحس بالغربة بس كنت واخده أصدقائي الصدوقين معايا "كتابي و كراستي و قلمي" و قفت ساعة و نص الطابور أتحرك 5 متر بس........ صراحة فكرت جديا أروح لكن الإنقاذ جيه في صورة عمو بتاع البنبوني أشتريت بنبوني و شوية سوداني بالشيكولاتة و أول ما أكلتهم لقيت الظابط راح مقرر يسرع الطابور و دخلت اللجنة كانت تقريبا فاضية 5 بس قدامي و عجبني قوي الراجل اللي واقف على اللجنة لأته كان كل ما حد يتظمر يقولوا "إحنا بنعمل كده علشان بلدنا ....كلنا هنا علشان بلدنا"

هرتالات مسائية

تقصر المسافات أو تزيد و يظل القريب قريب و البعيد بعيد....من قال أن البعد بالمسافات......البعد و القرب شعور مثله مثل السخونة و البرودة....الحزن و السعادة............فتجد أحيانا أن أقرب إنسانا هو أبعدهم على الإطلاق و أبعدهم عنك أقرب الناس إليك....لكن لماذا نفشل أحيانا في تحديد أن كان هذا الإنسان قريب أو بعيد.....و لماذا نظل نتخيل أنه قريب رغم البعد...و هل هذا الشعور بالقرب أو البعد يحتمل الصواب أو الخطأ.........ام لأنه نابع من عقلنا الباطن فإن الخطأ فيه هو أميل لمحاولات فاشلة في الإنكار ليس أكثر........... و يظل شئ واحد هو المؤكد أن القريب يستحق الإهتمام و البعيد يستحق التجاهل