عارف بيقولوا إن البني أدم بيقعد يدور على الحكمة طول عمره و غالبا ما بيموت من غير ما يلاقيها................... و بما أني واحدة من البني أدمين (بإعتبار أني شكلهم) بدور على الحكمة في كل حتة ......إبتداء من الحكمة في غسل الموعين لحد الحكمة في كل الحاجات اللي بتحصل في العالم.................و طبعا ما بستوعبش أي حاجة بس اللي أنا مقتنعة بي أنك ممكن تطلع بفلسفة معينة من الأعمال اليومية اللي بتعملها حاجات typical للبني أدم هتلاقي أن تصرفاتك اللي بتعملها في غسل الموعين مثلا أو التدوير على الشربات الصبح بتتصرف فيها في حل مشاكلك اليومية......طبعا دي نظرية رنيمية بحتة (رنيمية نسبة ليه رنيم) يعني بصراحة نسبة الخطأ فيها اكبر من الصح..
1. التدوير على الشربات
كام مرة صحيت من النوم و أكتشفت أنك لازم تدور على جوز شربات علشان تلبسهم.......كام مرة في عمرك دورت على فردة شراب تكملك( صاحب في المدرسة أيام إبتدائي، كاتم أسرار لما كبرت شوية و بقى عندك أسرار أكبر من أنك خطفت قلم صاحبك، , و بعدين رفيق عمل حد تنجح معاه في شغلك و تعتمدوا على بعض، أو حد عندوا نفس الهواية اللي عندك تقعد تتكلم معاه فيها و تاخد رأيه في كل صغيرة و كبيرة، و في الأخر شريك حياة حد تتسند عليه في وقت الزنقة و يساعدك و يزقك و تجيب معاه عيال صغيرة يبقوا فيهم شوية منه و شوية منك)........... طيب عمرها ما حصلت معاك،أنك تبقى بتدور على فردة شراب شبه اللي في إيدك الصبح و تلاقي نفسك في الأخر واقف عليها ولا عمرك نزلت الصبح بفردتين شراب مش شبه بعد بالظبط علشان ما كنش في وقت تدور و دي كانت أقرب حاجة....طب عمرك ما لبست شراب و الدنيا ضلمة و أكتشفت أن الشرابين دول مش شبة بعض.......طيب عمرك ما بطلت تلبس شراب لفترة معينة و بعد كده رجعت تلبسه تاني علشان أنت محتاجة...... طيب مش ساعات لازم نوع معين من الشربت يتلبس علشان الجزمة تبان.............قارنها كده بالحياة و هتلاقي التالي أن أحيانا بتلاقي صحاب أو أحباب في أخر حتة أنت متوقعها.ناس كانت قدامك و فجأة تكتشف أنك هو ده اللي أنت بتدور عليه..........و ان أحيانا بترضى باللي قدامك مع أنك عارف أن في حد مناسب أكتر ليك علشان ما عندكش حل تاني..........و أحيانا برضة بتفتكرأنك لقيت أكتر شخص مناسب ليك مع أن في الحقيقة ده مش صح......... و أحيانا برضة فجأة كده تحس أنك محتاج صاحب قديم قوي بقالك عمر ما كلمتوش بس تلاقيك نفسك قوي تشوفه و تكلمه........... و أحيانا تانية تلاقي حد أنت مش بتحبه خالص و مش نافع معاك بس لقته لحد تاني............الناس زي فرد الشربات كل واحد ليه جوز شبهه بالظبط و شربات تانية لونه بس مش زيه بالظبط و شربات ألوان تانية و شربات مش نفس الخامة أساسا .......بس عمر ما تلاقي شراب بيعاير شراب أخوه
ليست هناك تعليقات:
إرسال تعليق