علشان عديتني الشارع

عزيزي أكس،

   فكرت كتير قبل ما أكتبلك الرسالة دي.... الرسالة دي فيها تعبير شديد عن إمتناني و تقديري ليك رغم كل الظروف اللي تمنعنا من إحنا نبقى أكتر من مجرد أصحاب عابرين..... طبعا أنت تستغرب أنا ليه بشكرك قوي كد الإجابة بسيطة جدا....علشان عديتني الشارع....أو بمعنى أدق علشان و أنت بتعدي معايا الشارع كنت بتقف ناحية العربيات من غير ما تتكلم أو تقولي تعالي الناحية دي و بتعملها كأنها حاجه عادية لازم تتعمل....طبعا هتستغرب لأنك مش فاهم أذاي حاجة هبلة جدا زي كده تستحق كل البروباجندا دي و يمكن كمان يضرب في مخك الجملة اللي قالها خالد أبو النجا لغادة عادل في فيلم "في شقة مصر الجديدة "اسمحيلي أقولك مع إحترامي لكل الرجالة اللي عرفتيهم في حياتك أنهم أكيد مابيفهموش"...... الحقيقة  أنا مش متأكدة إذا كان حد عملها معايا قبل كده و لا لأ...و لا متأكده إذا كان في حد عمل أكتر منها بكتير و لا لأ.....كل اللي أنا متأكدة منه أن دي كانت أول مرة يجيلي الشعور ده و أنا بعدي الشارع...شارع عبيط و العربيات ماشية بطئ جدا جدا و أنت بتلف حوليه بطريقة عفوية علشان تبقى ناحية العربيات لحد أني شكيت في نفسي أن يمكن أكون أنا بيتهيألي كل ده...و بعترفلك أن المرة اللي بعدها تعمدت أقف ناحية العربيات علشان أتأكد إذا كنت هتعملها تاني و لا لأ....و ابتسمت لما لقيتك بتكرر الحركة تاني و بتعملها بشويش علشان ما أخدش بالي أنك بتعملها.... عارف حسيت بإيه حسيت أني بنت لازم حد يأخد باله منها و ده شعور بقالي عمر ماحدش حسسني بيه....و أفتكرت علي سلامة و هو بيقول 

“زهقت من قولة
دي بنت بألف راجل
أنا عايزة أحس
إني معاك مخلوق ضعيف
وإني فعلا بنتمي لجنسي اللطيف

تحميني من حزني
ومن إحساس مخيف
طول النهار مكشرة
وواخداها جد
ولمّة شعري على ورا
ومش شايفة حد
والدنيا حر موت
وأنا مليانة برد
وكل دا عشان يا دوب
أعدي الرصيف

و الأحلى من كل ده أني عارفه أنك مش بتعمل كده علشان عايز مني حاجة و لا علشان تسبيتلي أنك راجل تستحق إهتمامي....عزيزي أكس شكرا أوي على الشعور ده شكرا أوي أنك عديتني الشارع