- قولي أذاي تبوص قي عينين بطوط الواسعين المبحلقين دول و ما تبتسمش
- قولي أذاي تبقى هتقع على الأرض لأن جوجي بتسلم عليك و ما تنبسطش
- قولي أذاي كوكي يتمرمغلك في الأرض و متبقاش عايز توطي تبوسه
- قولي أذاي تسمع نونة فلافي بيناديك علشان تفتحله الباب و ما تحضنوش
- قولي أذاي تسمع إيمان زكي بتقول "ترفعي" بعد سيل من الشكوى و متضحكش لحد ما الجيران تشتكي
- قولي أذاي تقضي نص ساعة بتتناقش في هرتالات مع الاء و ماتكتشفش بعدها قد إيه هي وحشاك
- قولي أذاي تقعد مع منى على كرسي المقلوبين و ما تضحكش و تعيط في نفس الوقت
- قولي أذاي تراوح مع مروة في العربية و متغنيش ورا عامر منيب "جيت على بالي" بصوت عالي و أنت مستمتع
- قولي أذاي تقعد على ترابيزة مطبخكوا مع أروى تشرب نسكافيه و متقولهاش كل اللي مضايقك
- قولي أذاي تتكلم مع أسماء و ماتحسش أنك عجول
- قولي أذاي تقعد مع د. سوزان عشر دقائق و ما تحسش أنك مليان أمل
- قولي أذاي تعرف ولاء و ما تحسش أنك مسؤول عنها
- قولي أذاي تخرج مع إيمان حملي و ماتروحش منتشي من الهرتلة
- قولي أذاي تسمع خديجة بتتكلم عنك و ما تحسش أنك عظيم
- قولي أذاي تقعد تحكي مع ياسمين عن كل مشاكلك العائلية و ما تحسش أنك مرتاح
- قولي أذاي تقعد مع إيمان حسن على سور الجراحة الساعة 2 بليل و ما تحسش أنك عندك صاحب بالدنيا كلها
- قولي أذاي موكي تقولك أحكيلي حدوتة و مايجيش في بالك 50 حدوتة مرة واحدة
- قولي أذاي تأكل الشيكسو اللي روان مخبياها و ماتحسش أنك كوغد سعيد
- قولي أذاي تصحى من النوم تلاقي حاجات منطورة في كل حتة و ماتفهمش أن ده عبدالرحمن
- قولي أذاي أمك تقولك "أستودعك الله الذي لا تضيع ودائعه" و ما تحسش أنك مطمئن
- قولي أذاي أذاي أبوك يقولك "أنت زي القمر " وماتشوفش نفسك حلو
- قولي أذاي تفتكر اليوم اليوم اللي خرجت فيه لابس هدوم الخروج فوق البيجامة من كتر البرد وما تحسش بالدفا
- قولي أذاي تعرفني و ماتحبنيش
- قولي أذاي تحبني و ما تقوليش
الجمعة، 30 نوفمبر 2012
قولي أذاي
الثلاثاء، 27 نوفمبر 2012
شهر نوفمبر
حملت نسمات الهواء الباردة لأحدى ليالي شهر نوفمبر رحيق مسك الليل .. فإبتسمت و شعرت أن ربما مازال هناك بهجة في مكان ما وسط كل هذا الظلام...... مازالت لا تحب نوفمبر رغم أنها كل مرة تنسى لماذا لا تحبه و تعاهد نفسها أنها ستعطي له فرصة أخرى فربما أكتشفت جماله..... و لكن الشهر الخبيث يعاهدها كل مرة بالنسمات الهواء الباردة و الشمس الدافئة ثم يحمل معه الكثير من الأخبار السخيفة التي تجعلها تجد صعوبة شديدة في التنفس....... بقت أيام قليلة على شهر نوفمبر و مازال يجد متعته الأولى في مضايقتها و إثارة رعبها و اللعب بخيوط حياتها ليزيدها تعقيدا.......و ليس هذا فقط ما يفعله بها شهر نوفمبر فهي تزداد حنينا فيه....و تجد نفسها تصارع كثيرا حتى لا تبكي و كثيرا ما تفشل في كتم بعض الدمع الذي ينسل منها رغم إرادتها ....... و أن كان هناك ما يميز نوفمبر فهو أنه يجعل الجلوس تحت البطاطين بكتاب و كوب من الشيكولاتة الساخنة متعة لا تضاهيها شئ سوى المشي في شوارع وسط البلد تحت أشعة الشمس الدافئة تتابع حركة الناس و تستمتع برائحة الكتب القديمة في مكتباتها العريقة ....... أرادت أن تكتب له خطابا طويلا من العاب أو ممكن رجاء أن يتوقف عن مضايقتها و مضايقة كل من تحب..... "عزيزي شهر نوفمبر ....أنا زعلانة منك فعلا !! هو انا زعلتك في حاجة أومال انت ليه مُصِر تزعلني..... و ياريت عليه أنا بس ده أنت بتشيلني هم فوق همي في كل اصحابي اللي بحبهم......... عزيزي نوفمبر أنا عارفة انك فترة إنتقالية في السنة بين الصيف و الشتا فلو كنت ناوي تبقى فترة إنتقالية بين اللي بيضايقنا و اللي يسعدنا فقشطة بس أن ماكنش فبشويش علينا لحسن إحنا مش حملك"
الأحد، 4 نوفمبر 2012
معبد حتشبسوت
في أخر يوم لينا في الأقصر و الأسوان أنطلقنا لمعبد حتشبوت و البر الغربي في يوم ترابي شديد الحرارة في منتصف شهر يناير ....... المعبد مترمم و لطيف و أن كان من الناحية الأثرية أقل المعابد إثارة بالنسبة لي...و الحقيقة مش عارفة هل ده علشان أيد الترميم اللي جت ناحيته فشالت من عليه أثار الزمن و لا لأن هو كده فعلا........... بس الحاجة الليأنا عايزة أحكيها هنا هي حكاية حتشبسوت ....علشان تفهم أول حتة في حياة حتشبسوت ........ في مصر القديمة كان الولد اللي يحكم لازم يبقى إبن الملكة الشرعية و لو الملكة الشرعية ماخلفتش ولاد فكان ممكن الإبن من محظية يمسك الحكم بس بشرط أن يتجوز بنت الملكة (يعني يتجوز من الأخر اخته من أبوه)............ ركزوا بقى في الحتة دي ......تحتمس الأول (أبو حتشبسوت) أتجوز الملكة أحمس (أم حتشبسوت) بس خلفتها كلها كانت بنات..... فأتجوزت حتشبسوت من أخوها الغير شقيق (تحتمس التاني) و جابت منه بنتين برضه ....... تحتمس التاني جاب تحتمس التالت من محظية ...و علشان يمسك الحكم أتجوز بنت حتشبسوت......فبكده بقت حتشبسوت عمته (لأنها أخت أبوه في الأساس) و مراة أبوه و حماته (لأنه أتجوز بنتها)
شجرة عيلة حتشبسوت
بعد موت زوجها مسكت حتشبسوت الحكم لمدة 22 سنة و بعدت تحتمس التالت ....المؤرخين ماكنوش متأكدين بالظبط هي عملة إيه في تحتمس التالت سجنته و لا دخلته الجيش....و لأن بعد كده تحتمس التالت كان قائد جيش معتبر و قام بعمل فتوحات في كل حتة فالمؤرخين أستنتجوا أن غالبا كان في الجيش (المؤرخين سموه بونابرت الفترة دي) ...... و حتبسوت ممسكنش الحكم بالساهل ففي الفترة دي ماكنش متقبل أبدا أن واحدة ست تمسك حكم البلاد بس تحتمس التالت كان لسه ساعتها صغير فتوجهت حتشبسوت لكبير الكهنة المصريين علشان تطلب منه الدعم و وافق كبير الكهنة بشروط..........شرط رقم واحد أنها تبقى "كيس جوافة" و هو يمسك حكم مصر من تحت لتحت و ما تأخدش أي قرار من غيره........... شرط رقم إتنين أنها لما تطلع للشعب تلبس الملابس الرجالي للفرعون (و علشان كده تلاقي كل تماثيل حتشبسوت بالملابس الرجالية مع وضوح شديد في الملابس الأنثوية......... حكم حتشبسوت كان مليانن خير على الناس كلها....و لو حد مهتم باللي عملته يراجع ويكبيديا
بعد موت حتشبسوت مسك تحتمس التالت الحكم و الحقيقة انه كان مغلول منها حبيتين و حب ينتقم منها بأنه يتمص كل الحاجات اللي عملتها و يكتب عليها إسمه فغطى الحتت اللي مكتوب عليها إسمها في المسلتين بتوعها في معبد الكرنك و ردم على المعبد بتاعها و بنى جنبه معبد أكبر بكتير........ و لأن مافيش واحد يجي على واحدة ست و يكسب أبدأ حتى بعد ما تموت حصل زلزال شديد جدا سنة 600 قبل الميلاد (تقريبا) و على أثر الزلزال وقعت الحتت من المسلة اللي كانت متغطية و المعبد بتاع نحتمس التالت اتهد تماما إلى من أجزاء بسيطو و ظهر معبد حتشبسوت من الردم و كان التأثير عليه طفيف جدا
"أخر حاجة أحب أحكيها ان في صورة بتعليق لطيف جدا على جدران المعبد..... زعيم بونت "بارهو" وكان يتبعه زوجته "اتى" بجسدها الضخم واثنين من ابنائه "
وابنته. يلى ذلك منظر الحمار الذى كانت تركبه الزوجه وعليه نص ظريف يقول " حمار الذى يحمل زوجته"
*كل المعلومات المكتوبه هنا من المرشد السياحي المرافق لينا الإستاذ منتصر و في حاجات كنت فاكرها طشاش أستعنت بمواقع هكتب أسميها
الاشتراك في:
الرسائل (Atom)