يا عيني يا طنط

إنهارده كنت بكلم أنتيمتي ....أقدم أنتيمه عندي ....عارفهم دول اللي أنت تعرف كل عيلتهم مامتهم و باباهم و خالتهم وولاد خالتهم و هلم جره........... و هم يعرفوا كل تفاصيل حياتك و أسرارك اللي مش قد كده...................أيوه هي صحبتي دي كده.....و كانت طنط مامتها مثال حي على الأمهات اللي معندهمش أي مشكلة أن بناتهم يقعدوا جنبهم و متيقنين أن الحاجات دي نصيب و ماحدش بيأخد أكتر من نصيبه أبدا ........و أنا طبعاً قاعدة براقب الأمهات واحدة ورا التانية بينهاروا علشان انا و أصحابي كلنا قاعدين و طنط ما شاء الله لسه ثابته على هذه المبادئ العظيمة.........و من كام يوم كده طنط إنهارت...........قالت لصحبتي "هو ماله فلان ...ما هو كويس ؟؟!" ياعيني صاحبتي فتحت بقها" فلان !!هو أنت يا ماما جايه تفتكري بعد 9 سنين!!"
-طنط "ما تحولي توقعيه" و أي حد يعرف طنط كويس يتأكد أن الجملة دي مش في قاموسها أساسا _أنا شخصيا لو سمعتها بوداني دول بتقول كده عمري في حياتي ما هصدق ............ فصاحبتي طبعا ردت الرد اللي كلنا بنقوله لأمهاتنا "و أنا لو بعرف أوقع كنت لسه قاعدة جنبك لحد دلوقتي" بغض النظر عن أن اللي صاحبتي عملته بعد كده كفيل بأنه يطفش أي كائن هلامي في الدنيا ...إلا أن  الكلام اللي طنط قالته ده خلانا نفكر _أنا و صاحبتي_ هو إحنا كبرناااااااا قويييييييييييي كدههههههههه لدرجة أن طنط قررت تنهار و تتكلم........ بس بجد طنط صعبت عليه قوي ...يا عيني يا طنط

مش رومانسي و لا حاجة

قالوا بطل تدور عن الحب وهو هيلاقيك و أنا زي كل البنات دي عندي تلت حالات لا رابع لهم يا أما نفسي أتحب دلوقتي حالا يا أما حسة أن ده مش وقته خالص و دي فترة الأمتحانات و ما قبلها يا أما ما فيش حاجة فارقة معايا لا أنا عايزة أتحب و لا أنا مش عايزة أتحب. بس لاحظت حاجة غريبة جدا أن أنا أول ما بطل أفكر في موضوع الحب ده و ربنا يهديني كده و احترم نفسي فجأة ألاقي الحب هجم عليه من كل مكان. أي حد يقرى الكلام ده يقول طب أيه الغريب في كده ما هو ده اللي مكتوب في اللأول. لأ لأ أنتوا فهمتوني غلط أه هو بيهجم عليه يعني أنا بحب حد ولا حد أتعمى في نظره أقصد فتح و شافني و حبني لأ بلاقي كل الناس اللي حوليه بيحبه و بيتخطبه و بيتجوزه ألا أنا و ناس معينة هما عرفين نفسهم كويس و ألاقي نفسي بتمرجح بين الحالتين الأولى و الثانية, فبقولها و بكل ثقة أي حد نفسوا صحابة أو عالته يتجوزوا ما يفكرش في الحب. أما هو شخصيا فعوضوا على الله لأن سواء كان بيفكر في الحب, حاسس أنه مش وقته أو مش فارق معاه فكده كده مش هيلاقيه و كل اللي بنئمله أن ربنا يستجيب لدعوة عمتي " ربنا يرزقكم بشلة عرسان هبل يتجوزوكم و نخلص منكم" مع تعديل بسيط في موضوع الهبل ده