أشمعنا

مع أن الواحد متأكد أن ربنا موزع الأرزاق و أكيد أكيد شايلك حاجة كويسة بس ساعات بتجيلك "أشمعنا" ليه أنا كمان محصليش كده و دايما بتلف و تلاقي نفسك بتوصل لتفسير من التفسيرين يا إما "يمكن أنا بعمل حاجة غلط و مستهلش حاجة كويسة" يا إما "إنشاء الله ربنا شايلي حاجة كويسة قدام بس مش وقتها دلوقتي" و ده بيعتمد على مدى رضاك عن نفسك و عن إيماناتك......و مع أن الواحد بيستغفر ربنا و يقول يارب سامحني على اللي أنا بقوله بترجع كل شوية تنط في دماغك....شكلها كده "أشمعنا" من عمل الشيطان أو بالأحرى عمل النفس. 

السعادة في الأشياء الصغيرة

من فترة بدأت أستغل الوقت اللي بقعده في الوحدة الصحية مابعملش حاجة و برغي مع زمايلي و أعلم شوية عيال في الحتة اللي حولين الوحدة...... و لما أقول أني بتعلم بسببهم حاجات أكتر من اللي بعلمهلهم أنا مش ببالغ ....و ببقى في منتهى السعادة لما يبدأوا يقروا و لا يتفاخروا بين زمايلهم بحاجة أنا معلمهالهم....أو لما أشوف في عينيهم سعادة و هما مش مصدقين أنهم عملوا حاجة عظيمة زي رسمة رسموها و لا كلمة صعبة عرفوا يقروها لوحدهم...أو حاجة ماكنوش فهمينها و فاكرينها صعبة و لما فهموها أكتشفوا أنها سهلة عادي...... السعادة مش بس في الحاجات الصغيرة اللي الواحد بيعملها لأ السعادة بتيجي في كل ما هو صغير في الحجم أو السن..... هتلاقي أن أي حركة صغيرة بيعملها طفل صغير كبيرة قوي في عينين أهله و أحلى حيوانات هي الصغيرين في السن........  علشان كده القرب من الأطفال بيخاليك تتمتع بحاجات كتير بحياتك ...... و أكتر حاجة أكتشفتها في الموضوع ده أن اللي بيقولك أن العيال مش عايزة تتعلم كداب كبير ...الولاد اللي بيجولي بيجوا بمحض إرادتهم و بيبقوا مبسوطين أنهم موجودين و حتى لما أكسل و أزهق نظرات عينيهم اللي بتقولك أنهم مستنين منك حاجات كتير و بيحبوكي مهما قسيتي عليهم و لا زعقتيلهم بيخليكي تكملي...... إنهارده حصل موقف صغير جدا تسبب في سعادتي ...من فترة و إحنا قاعدين في الفصل ولد عنده 11 سنة تقريبا رمى طوبة على واحدة من البنات و قل أدبه و أنا أتنرفزت جدا جدا عليه و على مامته ....إنهارده لما أبتدينا لقيتوا واقف على الباب فقلتله "أدخل لو عايز تيجي" دخل بشوية بتحفز كده و هو مش متأكد أنا هعمل فيه إيه..... كنا بنتعلم أزاي نكتب أو نرسم قصص فقلتله "بص يا أحمد اللي أنت هتقول عليه هرسمه فضحك كده مش مصدق و بعد ما خلصنا و أديت كل واحد منهم ورقة و قلم علشان يرسم قالي "هو أنا ممكن أجي علطول ".... و ده كان كفاية أني أحس بقيمة السعادة في الحاجات الصغيرة

ملبك بالحب ملبك

"و ملبك بالحب ملبك" فيروز

و يمكن هو ده أكتر شعور و حشني...يمكن أكتر حتى من شعوري بالرغبة الملحة أني أحس أني عملت حاجة مهمة في حياتي!!! نفسي أقف قدامك و تقولي كلمة حلوة و مبقاش عارفة أروح فين و يبقى نفسي أطير في السما أو أرقص رقصة نصر قصيرة. و لا أقف قدامك و يبقى نفسي قوي أحط إيدي على إيدك علشان أدفى فيها لدرجة أني مش عارفة أرد عليك و أنت بتتكلم من كتر ما أنا بحاول أسيطر على نفسي علشان معملهاش فعلا...........أو أبقى خايفة لا تسمع صوت قلبي من كتر ما بيضرب جامد و بصوت عالي قوي لمجرد ان عينك جت في عيني بالغلط..........أو أفضل مبحلقالك و مش عارفة أبص لحد تاني و أنت بتتكلم أو حتى و أنت ساكت و عينيا الحمارة بتقول "أنا بموت فيك و مش عارفة أعمل إيه........... و أفضل طول اليوم عمالة ألف حولين نفسي يمكن أخبط فيك صدفة و لا حاجة  و لا قلبي يوجعني قوي قوي من كتر ما أنت واحشني و أبقى عايزة أحط إيدي عليه علشان أدفيه من السقعة اللي أنت سبتها وراك..... و هو ده أنك تبقى ملبك بالحب :)