القلب

فاكر شعورك أول مرة قلولك أن القلب شكله مش زي ما بترسمه!!! فاكر في الأول كنت منبهر قد إيه و كان نفسك قوي تروح البيت علشان تحكي لمامتك و باباك و بعد كده لما لقتهم عارفين قعدت تقول لولاد الجيران و أخواتك الصغيرين للأنك كنت حاسس أنك أكتشفت إكتشاف رهيب........ طب تقدر تفتكر كام مرة رسمت قلوب على جنب الكشكول اللي بتذاكر منه....كتير مش كده عمرك رسمت القلب بغرفة الأربعة و الأنابيب اللي طالعة منه..........صراحة مظنش عملتها أبدا و لا إيه!! طب فاكر أول مرة عرفت أن الناس مش بتحب من قلبها زي ما إحنا فاكرين دي بتحب من مخها...... و لما عرفت أن القلب ده زيه زي المتور اللي في عمارتكم و كل اللي بيعملوا أنه بيوصل الدم لسكان الجسم....... أكيد أحبطت أو حتى أستغربت بقى القلب بجلالة قادرة زيه زي المتور!!!!! طب بذمتك لحد دلوقتي لما بتقول لحد أنا بحبك بترسملوا مخ و لا قلب !!! طب بترسم قلب ليه و أنت بتحبه من مخك!!! و ليه بنقول قلبي واجعني و ليه بنقول قلبي أتكسر و ليه بنحط إيدينا على قلبنا لما نفتكر أو نحس حاجة حلوة أو نحس حاجة وحشه......... ليه ما بنحطش إيدينا على رأسنا .......مع أن دي حقائق مثبتة علميا........ و حتى بعد ما تقرأه السطور دي هتلاقي نفسك لسه برضة بتقول "أنا بحبك من كل قلبي" مش من كل مخي و لو قلت لحد "أنا بحبك من كل مخي" تقريبا هيعتبرك مريض و مختل......... الفكرة بقى أن الأحلام كده برضه مع أن ممكن تكون مثبتة علميا و واقعيا أنها مش هتتحقق بس برضة بتفضل ماسك في حلمك و عندك أمل أنك تكون أنت اللي بتكسر الواقع ده و أنت اللي تحقق المعجزة و تحقق حلمك....... أوعى ترسم قلب في جنب كراستك زي ما هو في كتاب العلوم.......أوعى تقول لحد أنا بحبك من كل مخي و أنت ما بتهزرش و أوعى تسيب الواقع و العلم يقنعك أن حلمك مش ممكن يتحقق لأن كل أحلام زمان بقيت وقائع دلوقتي حتى لو كانت مستحيلة وقتها