نادرا ما بكتب عنوان أي حاجة قبل ما أكتبها هي شخصيا.......عمتا بكتب الموضوع و بعدين أشوف الإسم اللي ضرب في رأسي علشان يعبر عن القصة أو شوية الهرتلة اللي بتيجي في دماغي..................إنهاردة كتبت العنوان الأول مش عارفة ليه جيه في دماغي.....يمكن علشان الكتاب اللي كنت بقرأه......كتاب وراق الحب لخليل صويلح..الكتاب بيتكلم عن واحد بيحاول يكتب رواية، و رغم أن الفكرة حلوة بس أنا معجبنيش الكتاب......بغض النظر!! إنهاردة انا كنت بفكر أنا بكتب ليه؟؟ الأول كنت مقتنعة أني كاتبة عظيمة و طريقي ممهد لجائزة نوبل للأدب و أن مافيش أحسن من كده...... و بعدين رجعت لوعي بعد ما قريت كتير لكتاب محترفين و لبعض أصدقائي الهواه........... و قلت خلاص أنا هكتب علشان نفسي...علشان الكتابة بتريحني و بتبسطني...........و في النص بعد حملة المدونات المطبوعة لدار الشروق رجعت قلت أكتب لعل و عسى حد يتشنكل في كتاباتي و تعجبه و يشوف أنها ممكن تتنشر.....و أخيرا رجعت مرة تانية لقواعدي سالمة أنا بكتب لنفسي علشان أنا عايزة أكتب أو محتاجة أكتب............ ساعات أكتب عن مشاكلي، ساعات أوصف يوم حلو قوي أو وحش قوي عدى عليه و شايفه أنه يستحق التسجيل لأنه يوم مش المفروض يتنسي.............. و عمري ما بخطط أنا هكتب إيه و أحط نقط و أمشي عليها لأ أنا بكتب كده و خلاص........ أحيانا تبقى في جملة معينة بتلح عليه قوي قوي بقالها كام يوم فأكتبها على ورقة و أكمل عليها حدوتة أو خواطر.........و ساعات أقعد أحلم بحاجة معينة ممكن تحصيلي و أسيب الفكرة تخمر كام يوم و بعدين أكتبها بس مش عارفة ليه دايما بتبقى لقطة واحدة...مش أكتر من كده و ساعات لقطة فيها دستة لقطات من الماضي كذكريات......... و رغم أني عارفة أن أنا بكتب هرتلة أكتر من كتابات ذات قيمة أدبية و أني عندي أخطاء إملائية شنيعة يعاقب عليها القانون و أن أصحابي كتير بيقولولي كلام حلو بس علشان أنا صحبتهم و مضطرين يقرأوا اللي أنا بكتبوا بس أنا ساعات برجع أقرأ الحاجات اللي أنا كتبتها و أقول " طب و الله أنا كويسة أهو"........ بس يفضل عندي حلم واحد مش قادرة أتنازل عنه أني أكتب كتاب واحد أو قصة واحدة تستحق الذكر...قصة تبقى مفضلة عند حد وكل ما يضايق يفتحها يقرأه فيها.....يا مسهل!!
ليست هناك تعليقات:
إرسال تعليق