بغض النظر عن الإسم اللي مكتوب على الغلاف بتاع الكتاب ده، أحب أؤكد أن الكتاب ده إسمه الحقيقي "يا رايح كتر من الفضايح" و الحمد لله أن إحنا لقينا إسم غيره علشان أنا شخصيا كنت هقلق أن إسمي يتحط على كتاب بالعنوان ده (مع ان العنوان كان فكرتي)...... أنا شخصيا طول عمري نفسي أكتب كناب عني أو عن أي حاجة..... فأني أشتغل فالكتاب ده "was a dream that came true"
زي ما بيقولوا...... لما جينا انا و صديقاتي الأعزاء نعمل الكتاب ده كان عندنا كذا سبب ....مش قادرة أحدد هما مهمين و لا لأ....سبب رقم واحد أن إحنا حسينا أن حياتنا كوميدية زيادة عن اللزوم و أن كانت في كتير من الأحيان كوميديا سوداء....سبب رقم إتنين أن إحنا ملقناش سبب وجيه لكل اللي بيحصلنا_غير أنه يبقى تكفير ذنوب_ فقلنا نعملنا سببب.... فبقى الكتاب ده هو الشماعة اللي بنعلق عليه مشاكلنا فأي حد فينا يحصله حاجة غبية أو سخيفة يبقى علشان نحطها في الكتاب....... و أهو لو الكتاب فرقع و لا حاجة و جبلنا فلوس يبقى كسبنا حاجة من المواقف اللي حصلتلناغير أن إحنا نتعلم منها دروس بتساعدنا بمنتهى القوة أن إحنا نقع في ذات الخطأ تاني مرات عديدة......... و سبب رقم تلاتة أن مهما حصل لأي بنت من مواقف سخيقة فإحنا بنحب نأكدلها أن في ناس حصلتلها مواقف أسخف من كده عسى أن ده يصبرها تحت مبدأ "اللي يشوف بلاوي الناس تهون عليه بلوته" .....الكتاب فيه مجموعة من القصص كل واحدة فينا كاتبة قصصها الشخصية...و بما أن كل واحدة بتكتب بإسلوبها فمتستغربش لو لقيت أن أسلوب كل قصة مختلف عن الأخر...... هنحاول نبقى موضوعين على قد ما نقدر ......قبل ما تبتدوا تقرأوا الكتاب في شوية مصطلحات أحب أعرفكم بها علشان ما تهوش....... المصطلح الأول "كائنات هلامية" و ده معناه الذكور بمختلف أنواعهم...و "بطيخة" و ده معناه عريس .....و "المستنقع" أو "مستنقع البوم" ده إسم الشلة بتاعتنا... أو زي ما بيقولوا الإسم الحركي..... المستنقع في ناس كتير و هنتكلم عليه بالتفصيل بس المستنقع فيه شخصيات محورية ثابتة هم اللي هيبقوا أبطال الكتاب ده......... و في الأول مش في الأخر أتمنى لكم من كل قلبي قراءة ممتعة
ليست هناك تعليقات:
إرسال تعليق