فيلم لحن الخلود

إنهاردة كنت بتفرج على فيلم لحن الخلود و مع أني شفت الفيلم كذا مرة قبل كده... بس مش عارفة ليه المرة دي كنت مضايقة جدا جدا فعلا....كنت عايزة أرجع عليهم (أسفة على إستخدام اللفظ ده بس ده كانت أكتر حاجة كويسة جت في دماغي)..........و حسيت أن النهاية غير منطقية بالمرة.......لأي حد ما يعرفش الفيلم دي نبذة عنه..................ماشي الفيلم بيحكي عن أختين (فاتن حمامة و ماجدة) يعرفوا مطرب(فريد الأطرش) معرفه عائلية و فاتن حمامة بتحبوا بعدين أبوهم بيموتوا و يجي عمهم و بنت عمهم (مديحة يسري) يخدوهم يعيشوا معاهم...............يقوم إيه فريد الأطرش يحب مديحة يسري و يتجوزها و بعد كده يكتشف أنهم قال إيه مش بيحبها ده كان بيحب فاتن حمامة....و يدور حوار غبي كده عن الحب و التضحية و ما تبنيش سعادتك على تعاسة غيرك.....تروح فاتن حمامة عيانة و مديحة يسري تتبرع بجوزها اللي هو فريد الأطرش لفاتن حمامة علشان تعيش......... مع كامل إحترامي و تقديري لكل الناس العظيمة دي بس الموضوع ضاغط على أعصابي .....فأنا لقيت أن الحل الأمثل أغير النهاية و دي النهايات المقترحة

نهاية واحد: أن فريد الأطرش يكتشف بعد شوية أنه بيحب مراته و يفضل معاها و فاتن حمامة تقضيها شرب سجاير و تربية قطط

نهاية إتنين: أن مديحة يسري تجيلها acute psychosis و تقتلهم هما الإتنين و بعدين ما تأخدش إعدام لأنهم أثبتوا أنها كانت بتعاني من مشاكل نفسية حادة وقت وقوع الجريمة...و تبقى مديحة يسريي الست المجنونة اللي بتشرب سجاير و بتربي قطط
نهاية تلاتة:(أنا مايلة لدي أكتر واحدة): أن فريد الأطرش بعد ما يتجوز فاتن حمامة يكتشف برضة أنه ما بيحبهاش....زو يطلقها و يتجوز واحدة تالتة خالص........و تروح فاتن حمامة تتلم على مديحة يسري و يقضوها هما الإتنين شرب سجاير و تربية قطط

بس بغض النظر عن أي نهاية في كلمتين محشورين في زوري كان نفسي فاتن حمامة لفريد الأطرش لما أكتشف أنه بيحبها بعد ما أتجوز واحدة تانية و هي مزروعة قدامه من زمان "أمشي بعيد يا بابا كان من زمان يا عينيا" أو "كان على عيني يا حبت عيني"

أي حد شايف أني معقدة لإانا بأكد على المعلومة أنا معقدة من كمية الكائنات الهلامية اللي بتعمل حركات غبية في بنات الناس و لأ مش هقولهم مامتك و أختك....بس أحب أقلهم"خليك راجل و أعرف أنت عايز إيه قبل ما تعمله"!!!!! تعبت من الطبطة على ضحياكم